Ky paragraf nga një intervistë TV e Gent Cakaj të emëruar nga Kryeministri për ministër të Jashtëm është qëmtuar nga Presidenca dhe e ka cilësuar si të rrezikshëm për Shqipërinë, Kosovën e gjithë rajonin.
“… Tani te korrigjimi i kufijve semantikisht kjo nuk është thjeshtë një operacion linguistik për ta relativizuar çështjen e këmbimit territorial, por situata ka evoluar tutje. Evoluimi i parë është, sepse po konceptohet në suaza të korrigjimeve të përgjithshme territoriale që janë duke ndodhur në Ballkanin Perëndimor”, përfundon citimi i Cakaj-t nga Presidenca.
Presidenti Meta i konsideron këto deklarata të rrezikshme dhe me pasojë të paparashikueshme në rajon dhe më gjerë, në planin dypalësh dhe më tej, janë në kundërshtim të hapur me politikën rajonale të shtetit shqiptar, të NATO-s dhe të vetë Bashkimit Europian.
Mirëpo a e di Presidenti që në fakt korrigjim, demarkacion apo përcaktim kufijsh (s’ka rëndësi termi) realisht po ndodh si proces në të gjithë Ballkanin Perëndimor. Vetë Kosova e mbylli një proces të tillë me Malin e Zi, Sllovenia me Kroacinë etj. Shteti shqiptar dhe vetë Presidenti Meta kanë inkurajuar Kosovën për përmbylljen e një procesi të tillë.
Citimi apo keqleximi i deklaratave të zëvendësministrit të Jashtëm është proces i pastër politikisht apo i ndikuar nga faktorë të tjerë që Ilir Meta nuk i thotë?