Serie A e futbollit në Itali zhvilloi këtë të diel gjashtë nga dhjetë ndeshjet e raundit të 37-të, ose thënë ndryshe të parafundit të sezonit.
Përveç Juventusit që u mposht 0-2 në shtëpi nga Fiorentina, të gjitha skuadrat që kërkojnë një vend në Champions League kanë siguruar tri pikë. Interi barazoi 1-1 kundër Veronës, me zikaltërit që do të festojnë sot titullin e 21-të kampion të Serie A në rrugët e Milanos.
Roma fitoi 2-0 në ‘Olimpico’ derbin kundër Lazios dhe merr vendin e katërt, ndërsa tri pikë edhe për Milanin që mposhti 1-2 Genoan në udhëtim. Napoli u kujdes të fitonte 0-3 në Pisa duke siguruar matematikisht vendin e dytë dhe Championsin me 73 pikë. Këtë mesditë Juventusi ishte hija e vetvetes duke u rrëzuar në vendin e gjashtë (68 pikë), Milani me 70 pikë mban vendin e tretë, ndërsa edhe Roma ka 70 pikë, por mban vendin e katërt. Como me 68 pikë merr vendin e pestë.
Zona Champions League (katër vendet e para) do të vendoset raundin e fundit fundjavën që vjen. Napoli pret në shtëpi Udinesen, Milani luan në ‘San Siro’ kundër Cagliarit, Roma udhëton për në Verona, Como luan në Cremona, ndërsa Juventusi përballet në derbin kundër Torinos, me ‘Zonjën e Vjetër’ që është me një këmbë jashtë Champions League.
NDESHJET
Roma 2-0 Lazio
Në ‘Olimpico’ Roma fitoi 2-0 derbin kundër Lazios duke u ngjitur në vendin e katërt me 70 pikë, sa Milani. Për djemtë e Gasperinit ishte Gianluca Mancini me golat në minutat 40-të dhe 66-të që ‘vulosi’ tri pikë shumë të rëndësishme për objektivin Champions League. Të dyja skuadrat e mbyllën ndeshjen me nga dhjetë vetë, pas daljes me kartona të kuq të Wesley (Roma) dhe Rovella (Lazios) në minutën e 70-të. Tifozët e Lazios braktisën derbin duke lënë shkallët e stadiumit bosh në shenjë proteste kundër presidentit Lotito.
Pisa 0-3 Napoli
Në ‘Arenën Garibaldi’ vendasit e Pisas u mposhtën 0-3 nga Napoli. Djemtë e Antonio Contes me këto tri pikë kanë siguruar zonën Champions për edicionin që vjen, ndërsa për momentin ndodhen në vendin e dytë me 73 pikë. McTominay, Rrahmani dhe Hojlund shënuan për miqtë. Pisa e ka siguruar prej javësh rrëzimin nga Serie A.
Genoa 1-2 Milan
Në ‘Luigi Ferraris’ vendasit e Genoas u mposhtën 1-2 nga Milani, me kuqezinjtë që siguruan tri pikë të arta që i mbajnë në vendin e tretë (70 pikë), brenda objektivit të Champions League. Me presidentin Cardinale në stadium, ishte Nkunku që shënoi golin e parë për Milanin nga pika e bardhë e penalltisë pas 50-të minutash lojë. Më pas, në minutën e 81-të Athekame shënoi golin e qetësisë për Milanin, para se Vasquez të shkurtonte shifrat në 1-2 katër minuta para fundit.
Como 1-0 Parma
Në stadiumin ‘Giuseppe Sinigaglia’ vendasit e Comos fituan 1-0 kundër Parmës falë golit të Morenos në minutën e 58-të duke u ngjitur në vendin e pestë me 68 pikë. Ndeshjen e fundit të sezonit Como e luan në udhëtim kundër Cremoneses dhe do kërkojë të përfitojë deri në fund nga gabimet e rivalëve. Skuadra e Fabregas e ka siguruar një vend në garat evropiane për sezonin e ri.
Juventus 0-2 Fiorentina
Dramë në Torino, Juventusi u mposht 0-2 nga Fiorentina dhe me 68 pikë zbret në vendin e gjashtë, teksa përpara këtij dueli ndodhej në pozitën e tretë. ‘Zonja e Vjetër’ nuk e ka gjithçka në këmbët e veta, teksa duhet të shpresojë te hapat fals të Milanit dhe Romës në raundin e fundit të Serie A për një vend në Champions, gjë që duket shumë e vështirë. Fiore fitoi në Torino pas tre vitesh e gjysmë, teksa për herë të fundit e bënte në dhjetorin e vitit 2022 me golin e Vlahovic në ndeshjen e fundit para se serbi të kalonte në Torino. Përpara këtij dueli Juvja kishte dhjetë ndeshje pa humbje (6 fitore, 4 barazime). Golat e sotëm për Fioren u shënuan nga Ndour (34′) dhe Mandragora (83′). Juventusit iu anulua një gol i Vlahovic në minutën e 70-të për pozicion jashtë loje.
Inter 1-1 Verona, festa e titullit
Interi këtë sezon u shpall kampion i Serie A për herë të 21-të në histori, ndërsa fitoi edhe Kupën e Italisë duke bërë dopietë. Sot zikaltërit luajtën ndeshjen e fundit përpara tifozëve të tyre në ‘Giuseppe Meazza’ duke barazuar 1-1 kundër Veronës. Inter kaloi në epërsi me autogolin e Edmundsson, ndërsa Verona barazoi në fund me Bouie.
Përtej rezultatit ekipi i Cristian Chivu ka bërë një sezon për t’u mbajtur mend dhe festa në Milano do jetë deri në mesnatë, aty ku parashikohet që pas orës 23:00 ekipi të përshëndetet me tifozët në ‘Duomo’ pas një parakalimi në rrugët e Milanos me autobus të hapur.
Serie A e futbollit në Itali do ta zhvillojë raundin e fundit, atë të 38-të të dielën e javës që vjen, ku do të mësohen edhe verdiktet finale për Evropën dhe mbijetesën.
Serie A, raundi i 37-të (i parafundit):
E diel, 17 maj 2026
12:00
Roma 2-0 Lazio
Como 1-0 Parma
Genoa 1-2 Milan
Juventus 0-2 Fiorentina
Pisa 0-3 Napoli
15:00 Inter 1-1 Verona
18:00 Atalanta – Bologna
20:45
Cagliari – Torino
Sassuolo – Lecce
Udinese – Cremonese