Shumë shtete partnere dhe qytetarë të ndryshëm, janë kthyer në një ndihmesë të madhe për Prokurorinë e Posaçme në luftën kundër krimit të organizuar dhe korrupsionit.
Arben Kraja e cilësoi vitin 2021 si vitin e kthesës së madhe për kthimin e besimit të drejtësia, ndërsa gazeta ka mësuar se janë në hetim shumë dosje sekrete. Në total SPAK ka 300 dosje të reja nën hetim. Bëhet fjalë për padi dhe hetime të nisura së pari falë ndihmës së qytetarëve dhe po ashtu në bazë të indicies së dhënë nga ndërkombëtarët. Një burim në SPAK i tha gazetës se bëhet fjalë për mbi 100 dosje, të cilat kanë ardhur nga qytetarë të ndryshëm, por dhe nga bashkëpunimi ndërkombëtar.
SPAK u krijua për të luftuar korrupsionin në nivele të larta dhe janë të shumë qytetarët që kanë besim aty. Prokuroria ka hapur dhe një rubrikë të veçantë në faqen e saj në internet ku qytetarët ftohen që të dorëzojnë informacione dhe të dhëna mbi vepra të ndryshme që janë kompetencë e kësaj strukture.
Sipas informacioneve janë mbi 100 raste kur qytetarët kanë dërguar dokumente, foto, informacione të tjera dhe kanë dorëzuar padi për zyrtarë administrate, gjyqtarë e prokurorë, si dhe për njerëz të tjerë me pushtet. Një pjesë i kanë dërguar me postë, pjesa tjetër personalisht dhe përmes internetit.
Ndërkohë mësohet se në shumë raste janë bërë padi për vepra penale që nuk janë në kompetencë të SPAK dhe ato janë deleguar në prokuroritë e rretheve. Ajo që bie në sy është se ka interes për SPAK dhe qytetarët janë të gatshëm të informojnë apo raportojnë për raste të dyshimta. Në shumë raste padi ka për gjyqtarë, pasi qytetarët janë përballur me kërkesa për para në procese gjyqësore.
Po ashtu dhe për funksionarë të lartë të administratës publike. Ndërkohë nuk kanë munguar dhe informacionet mbi pasuritë apo raste të tjera të dyshimta për njerëz të politikës. Nëse marrim një rast konkret, vetëm falë padisë së një avokati nis hetimi për gjyqtarët dhe prokurorët e ngelur në veting. Ndërkohë ka pasur padi të ngjashme dhe për shumë njerëz të tjerë, përfshirë dhe politikanë.
Roli i ndërkombëtarëve
SPAK ka arritur dy marrëveshje të rëndësishme gjatë javëve të fundit. Marrëveshja e parë u arrit me DNA e Italisë. Fokusi i marrëveshjes ishte shkëmbimi i informacioneve mbi grupet kriminale dhe sekuestrimin e aseteve të vendosura nga krimi. Një marrëveshje tjetër akoma dhe më e rëndësishme ishte ajo e firmosur me USKOK, prokuroria antikorrupsion e Kroacisë.
SPAK u ngrit sipas këtij modeli, pasi në Kroaci u dënuan shumë zyrtarë të lartë. Nga ana tjetër falë dhe Prokurorisë së Përgjithshme është bashkëpunuar dhe me dhjetëra shtete të tjera, të cilat kanë sjellë shumë dosje në vend, kryesisht për krimin e organizuar, por dhe për politikanë. Disa emra rezultojnë si të lidhur me grupet kriminale, ndërsa disa të tjerë kanë para jashtë vendit.
Gazeta e tha pak ditë më parë se kanë ardhur dosjet për 4 anëtarë të mazhorancës. Ndërkohë që pritet që shumë emra të tjerë të dalin zbuluar pas marrëveshjeve për zbulimin e llogarive bankare. Janë të shumtë ata që kanë para në parajsat fiskale apo dhe kompani offshore dhe bëhet fjalë për para korrupsioni apo krimi. Ndërkohë këtë vit pritet të ngrihet dhe Byroja Kombëtare e Hetimit, e cila do të ndihmojë akoma dhe më shumë në hetimet, sidomos për gjurmimin e parave jashtë vendit.