Kryeministri Edi Rama është përplasur në Kuvend me opozitën sa i përket çmimit të energjisë elektrike. Nga foltorja e Kuvendit, duke folur për krizën e çmimeve, teksa iu përgjigj edhe liderit demokrat Lulzim Basha, kryeministri Edi Rama premtoi, se qeveria nuk do t’i lërë vetëm shqiptarët ashtu siç nuk i la edhe pas tërmetit dhe në këtë periudhë pandemie.
Ai theksoi, se PD kur ishte në pushtet e futi në kolaps sistemin energjetik. “Ne do t’i mbështesim qytetarët dhe nuk do t’i lëmë vetëm ashtu siç nuk i lamë për asnjë moment në periudhën post tërmet dhe në pandemi. Ju ishit ata që një gjeneratë e futët në gropë, ju me politikën tuaj energjetike. Keni lënë gropën më të madhe në historinë e planetit, jo vetëm të Shqipërisë, në sektorin energjetik.
Edhe reformën për të ndaluar vjedhjet nuk e mbështetët, duke thënë se po futen njerëzit në burg se nuk paguajnë. Askush nuk u fut, por vetëm ata që vodhën”, tha kryeministri. Ndër të tjera, Rama ka hedhur poshtë deklaratat e opozitës se fatura e energjisë në vendin tonë është më e larta në vendet e rajonit. Ai tha, se vendi nuk ka më ekonomi të centralizuar, ku çmimet vendoseshin me urdhër nga lart, por ka treg të lirë kapitalist. “Ju u thoni shqiptarëve, fatura e energjisë në Shqipëri është më e larta në rajon.
Është e pavërtetë, është thjesht e pavërtetë. Siç është e pavërtetë diçka tjetër, fatura e energjisë dhe të gjitha faturat në sistemin që kemi zgjedhur dhe për të cilin, ju, me të drejtë, jeni krenarë që ishit pararoja si mishërimi i lëvizjes antikomuniste, kemi vendosur që të kalojmë nga ekonomia komuniste e centralizuar, e cila vendoste çmimet, me urdhër nga lart, në lirinë e tregut kapitalist. Dhe rritja e çmimit në bursë të një malli, qoftë energji, qoftë naftë, çfarëdo qoftë, qoftë miell, nuk pyet, as se Spanja ka më shumë, as se Shqipëria ka më pak”, tha Rama.
Rama replikon me deputetët e opozitës
Kryeministri Edi Rama, u përfshi edhe në replika me deputetët e opozitës, të cilët ngritën zërin pasi Rama, i quajti konceptet e tyre mbeturina të sistemit të vjetër. Rama kërkoi, që opozita të respektonte fjalën e tij dhe të mos ndërhynin, duke thënë se duhet që të bëhej një marrëveshje e tillë që kush flet duhet që të dëgjohet pavarësisht se ju pëlqen apo jo ato që thuhen.
“Konceptet tuaja janë mbeturina të sistemit të vjetër. Unë nuk ofendoj taksën, ndërkohë që këtu me respekt dëgjojmë të shara para e mbrapa, që nga të sharat për zonjën atje, e rreth e rrotull, po nuk merrem me ju se jeni në një hall që nuk ua zgjidh njeri. Me gjithë taksën e karbonit, nafta është sot më lirë se ç’ishte kur ishit ju. A ka mundësi të mbaroj unë, do e bëjmë marrëveshjen që kur njëri flet të tjerët dëgjojnë siç ju dëgjojmë ne ju kur flisni edhe pse nuk thoni asgjë. Se ndryshe unë e kam të thjeshtë, iki e ju lë këtu të flisni, por vij për respekt ndaj jush. Kur flasim dëgjojmë, na pëlqen apo jo”, tha ai.