Votimi i zgjatjes së mandati të organeve të vetingut në seancën plenare të Kuvendit këtë të enjte, ka nxjerrë në pah dobësitë e ish-kryeministrit Sali Berisha dhe ka rrëzuar pretendimet e këtij të fundit se gëzon mbështetje të madhe në radhët e PD.
Dy ditë më parë 118 deputetë, 73 të Partisë Socialiste, 41 të Partisë Demokratike dhe aleatët, 3 të Partisë Socialdemokrate dhe 1 “rebel” i Lëvizjes Socialiste për Integrim dhanë votën pro për të zgjatur afatet e shkallës së parë të procesit të vetingut deri më 31 dhjetor 2024. Gazeta ka siguruar procesverbalin e procesit të votimit botuar dje nga Kuvendi, teksa del qartë se janë Sali Berisha dhe 12 deputetë të tij që nuk morën pjesë në votim, ndërsa nuk kanë qenë të pranishëm në sallë nga PD e Lulzim Bashës deputetët Flutura Açka, Tomor Alizoti dhe ish-kreu i grupit parlamentar Alfred Rushaj.
Mungesa e vetme nga mazhoranca, e votave pro ndryshimeve kushtetuese është ajo e ministres së Infrastrukturës dhe Energjisë, Belinda Balluku, e cila nuk ka marrë pjesë në votim, ndërkohë që në votimet për vendimet e tjera të rendit të ditës ka marrë pjesë.
Megjithatë, burime pranë ministres Balluku, bën me dije se kjo e fundit ka refuzuar të votojë për zgjatjen e mandatit të organeve të vetingut, duke qenë se në krye të Komisionit të Pavarur të Kualifikimit është motra e saj dhe për këtë arsye ajo ka qenë në qendër të sulmeve të artikuluar nga opozita.
Berisha vetëm 12 deputetë pas vetes
Por ajo që bie në sy teksa shikojmë me kujdes procesverbalin e votimit, është fakti se ish-kryeministri Sali Berisha ka vetëm 12 deputetë që gëzon mbështetje, që së bashku me veten e tij, e çon në 13 numrin në total të ligjvënësve të dalë nga Partia Demokratike.
Më konkretisht sipas dokumentit, janë 13 deputetë të Komisionit të Rithemelimit që nuk morën pjesë në votim, sikundër janë Sali Berisha, Tritan Shehu, Luçiano Boçi, Agron Shehaj, Flamur Noka, Albana Vokshi, Edmond Spaho, Belind Këlliçi, Bujar Leskaj, Edi Paloka, Oerd Bylykbashi, Luan Baci, Sorina Koti. Ndërkohë që nga mbështetëset e Berishës që mori pjesë në votim dhe iu bashkua 2 abstenimeve të LSI, ishte deputeti Isuf Celaj.
Pra grupi i Berishës përbëhet nga 13 ligjvënës. Nga ana tjetër Lëvizja Socialiste për Integrim pati një “përçarje” të vogël, teksa Monika Kryemadhi, Petrit Vasili dhe Erisa Xhixho abstenuan ndërkohë që “rebeli” Agron Çela dha votë pro ndryshimeve kushtetuese.
Kujtojmë që vetingu kaloi këtë të enjte me 118 votat pro pas thirrjeve të shumta të faktorit ndërkombëtar. Socialistët u ndihmuan nga votat e deputetëve të Partisë Demokratike të cilët kushtëzuan kartonin jeshil me ngritjen e 2 komisioneve të Posaçme Parlamentare, atë për Reformën Zgjedhore dhe atë për Reformën Administrativo-Territoriale, për të cilat PD ka kërkuar edhe ndryshime kushtetuese.
Komisionet e reja u votuan respektivisht me 120 dhe 119 vota pro. Edhe aleatët e vegjël të djathtë respektuan vendimin e partisë që udhëheq opozitën, duke bashkuar votat pro.