Koncesionet në sistemin e shëndetësisë pritet të sjellin arrestime njësoj si koncesionet me inceneratorët. Një ish-ministër ka shkuar në qeli dhe krerët e kompanive të inceneratorëve janë në kërkim.
Por gazeta ka mësuar se kanë avancuar hetimet edhe sa i takon koncesioneve në sistemin e shëndetësisë, fillimisht Nisma Thurje dhe më pas Partia Demokratike kanë bërë padi për 3 koncesione, atë të Check-Up, të hemodializës dhe sterilizimit të mjeteve kirurgjikale.
Përveç marrjes në pyetje të shumë zyrtarëve, mësohet se SPAK ka sekuestruar të gjithë regjistrat dhe dokumentacionin që ka pasur Fondi i Sigurimit të Detyrueshëm Shëndetësor.
Në një raport që Kontrolli i Lartë i Shtetit ka publikuar mbi auditimin në këtë institucion bëhet me dije se shumë dokumente për Check Up nuk janë mundur të shqyrtohen sepse janë sekuestruar nga prokuroria.
“Kontrata koncensionare e ofrimit të Shërbimit të Kontrollit Bazë në kushtet e pandemisë, por dhe të efekteve financiare për punë të pakryer të saj e cila rëndon buxhetin e shtetit sipas të dhënave detajuar më sipër.
Kjo kontratë është në ndjekje dhe nga organet e prokurorisë gjë e cila është shqyrtuar edhe në materialin më poshtë… Sipas riauditimit dhe auditimit me zgjedhje i dokumentacionit të kaluar me bankat pasi për efekt riauditimi dokumentacioni fizik, është në organin e prokurorisë”, shprehet KLSH. Po ashtu bëhet me dije se që prej vitit 2015 e deri në vitin 2020 regjistrat e të dhënave janë sekuestruar nga SPAK.
“Nga grupi i auditimit në lidhje me këtë kontratë koncesionare janë kërkuar të dhënat në lidhje me faturimet dhe pagesat e kryera përgjatë vitit 2020 si dhe nivelin e realizimit të shërbimit (rastet e kryera dhe rastet e faturuara).
Nga ana e subjektit të audituar është përcjellë informacion në formë elektronike duke paraqitur tabelat respektive dhe gjithashtu është sqaruar se dokumentacioni justifikues për këtë kontratë është administruar nga Prokuroria deri në pagesën e fundit në muajin Mars 2020”, thekson raporti. Pra nga KLSH tregohet se kontrata koncesionare, pagesat e bëra dhe transfertat bankare janë sekuestruar nga prokuroria.
Fatura e koncesioneve
Në SPAK janë tre padi për koncesionet në shëndetësi dhe më konkretisht për koncesionin e sterilizimit, dializës dhe Check- Up. Për të tria këto padi, hetimet janë thelluar shumë, për të nxjerrë në pah shkeljen që është bërë me to. Ndërsa gjatë kësaj kohe, është bërë llogaria e fitimeve për secilin koncesion.
Përfitimet e PPP-së për koncesionet në fjalë janë mbi 4 miliardë lekë. Për koncesionin e sterilizimit janë fituar 2.7 miliardë dhe 500 milionë lekë për koncesionin e Dializës. Një tjetër problem që është konstatuar në këto koncesione është dhe mungesa e transparencës.
Por nëse shohim paditë që janë bërë në SPAK, ndër më të rrezikuarit është ish-ministri i Shëndetësisë Ilir Beqaj. Ai është ministri që firmosi të tri koncesionet. Mësohet se dhe për sterilizimin dhe hemodializën janë sekuestruar dokumentet.